कृषी

आइतबारसम्म कुन-कुन जिल्लामा देखियो सलह?

रुपन्देही, बारा र पर्सा जिल्लाबाट शनिबार नेपाल प्रवेश गरेको सलह किराको फौज एक दर्जनभन्दा बढी जिल्लामा फैलिएको छ। कृषि तथा पशुपन्छी विकास मन्त्रालयले आइतबार पत्रकार सम्मेलन गर्दै भैरहवा, पाल्पा, स्यांजा, सिन्धुली, रामेछाप, चितवन, मकवानपुर, काभ्रेलगायत जिल्लामा फैलिसकेको जानकारी दिएको छ। प्लान्ट क्वारेन्टाइन तथा विषादी व्यवस्थापन केन्द्रका प्रमुख सहदेव हुँमागाईंले भैरहवाबाट बुटवल हुँदै पाल्पा र स्याङ्जासम्ममा सलह फैलिएको बताए।

त्यस्तै सिन्धुलीमा पुगेको झुण्ड चियाबारी क्षेत्रतर्फ पुगेको छ भने पर्सामा निकै सानो झुण्डमात्रै पुगेको छ। पाल्पाको दोभानमा सलह पुगेको मन्त्रालयले पत्रकार सम्मेलनमार्फत जनाएको छ। रामेछापको केही स्थान, चितवनको राष्ट्रिय निकुन्ज, भरतपुर महानगरपालिका र कालिका नगरपालिकामा फैलिएको छ।मकवानपुर पालुङ र काभ्रेको फलामेटार क्षेत्रमा सलह देखिएको छ। यी दुई जिल्लाको सीमाना क्षेत्रमा सलहका झुण्ड देखिएका छन्। शनिबार बारामा देखिएको सलह त्यहाँ सामान्य क्षति गरेर जिल्लाको सैनामैना क्षेत्र हुँदै पश्चिमतिर उडान भरिरहेको छ।



Comment here